الرحال المصرى ابن بطوصة احمد الشهاوى مابين الفرح والحزن

خلانى اطير من الفرح .. وخلانى اتقهر من الغم .. اه والله زي ماباقولكم كده .. ولما حا احكى لكم حتعرفوا السبب وحتفرحوا معايا وحتتغموا برضه معايا .. ماهو لازم كده نبقى سوا على الحلوه والمره .. علشان ما اطولشى عليكم ندخل في الموضوع .. بس الاول نصلى على حضرة النبي علشان ربنا يهون علينا الغم ويفرحنا بالفرح .. بص ياسيدي .. الصورة اللى فوق دي شعار جامعة جراتس الهندسية .. دي جامعة نمساويه محترمه جدا وتعتبر هي رقم واحد في تصميم الماكينات في اوربا .. يعنى الاسم بتاعها نار على علم .. اللى بيدرس فيها تصميم ماكينات ويخلص الدراسة تبقى امه داعياله لانه عمره ماحيدور على شغل ابدا .. كلهم حيتخطفوه خطف وكلهم حيعرضوا عليه مرتبات الشئ الفلانى .. بس طبعا علشان تخلص جامعة زي دي لازم تدفع التمن .. يعنى تذاكر مذاكرة الجبابرة تسع او عشر سنين .. ماهى الدنيا كده وكل شئ له تمنه .. عايز تتجوز ست الستات لازم تكون قدها .. المهم انا من حوالى تلاتين سنه عرفت المعلومة دي وطلعت في دماغى انى مش حادرس غير في الجامعه دي علشان ابويا الله يرحمه كان بيقولي نفسي يابنى تتعلم احسن علام .. وبرغم ان ابويا توفاه الله وانا عندي 22 سنه لكن برضه قلت له حاعمل بوصيته علشان يرتاح في قبره .. الله يرحمه .. المهم كبرت في دماغى انى لازم ادرس في الكليه دي وخلاص .. برغم ان كل اللى معايا 200 دولار خدهم في جيبي وتوكلت على الله .. نسيت اقولكم حاجه قبل كده مهمه برضه .. انى قبل ما اسافر بره كنت خلصت دراسه كليه الهندسة في شبين الكوم .. يعنى انا درست الهندسة مرتين وفي جامعتين مختلفتين وخلصت الاتنين .. خلصت هندسه المنوفيه سنه 1979 في مصر وخلصت هندسة جراتس في النمسا سنة 1991 .. كده كويس .. يعنى انا اقدر اقارن بين الجامعتين لانى شفت دي وشفت دي .. بس انا مش حاقارن الدراسه علشان مش عايز ازعل حد منى .. الله امال انت بتحكى لنا الحكاوي دي كلها ليه ياشهاوي .. طب بس طولوا بالكم عليا شويه .. انا مش حاقارن المضمون العلمى لكن حاقارن حاجه تانيه خالص . . انا حاقارن الجواب اللى فرحنى وغمنى في نفس الوقت .. بص ياسيدي انا جالى النهارده جواب من جامعة جراتس النمساوية .. بيتكلموا فيه باسلوب راقى جدا وبيقولوا انهم لسه فاكرينى برغم انى خلصت الدراسة عندهم من 25 سنه .. اي والله زي ماباقولكم كده .. بيقولوا انهم لسه فاكرينى وان الجامعة بتدعونى لحفل تكريم رسمى وان الجامعه ستقوم بمنحى الوسام الفضى بمناسبه 25 سنه على تخرجى منها .. دي الجامعه النمساويه .. طبعا حاجه تفرح ان الجامعه بتاعتك لسه فاكراك .. نسيت اقولكم كلمه حق وان ده مش الجواب الاول من الجامعه دول كانوا علطول بيبعتوا لي كل سنه جوابين او تلاته في مناسبات مختلفه .. يعنى على اتصال دائم عن طريق الجوابات ولكن المره دي بقى لازم تيجى واحتفالات رسميه واوسمه وشهاده فخريه وشغلانه كبيره وبيبعتوا قبل الميعاد بتلات شهور علشان تظبط نفسك .. كتر خيرهم .. لمسه جميله فرحتنى طبعا .. امال الغم بقى حييجى منين? .. اصل انا زعلت لما افتكرت انى برضه خلصت الدراسه من زمان من جامعه المنوفيه ولاعمرهم سألوا فيا ولا بعتولي ولا جواب ولا حاجه .. فاخدت على خاطري ليه مايتصلوش بالمهندسين اللى اتخرجوا من عندهم وجايز يستفيدوا منهم لانهم بقوا مهندسين كبار وتخصصوا في مجالات مختلفه وعندهم خبرات كبيره ممكن تفيد البلد والجامعه هى ممكن تكون حلقه الوصل .. فصعبت عليا نفسي ان الجامعه النمساويه افتكرتنى والجامعه المصريه لم تفتكرنى .. مش باقولكم جواب يفرح وفي نفس الوقت يفكرك بحاجه تغمك .. بس معلهشي انا مسامح واختلق لهم العذر لان مؤكد جامعه مصر بتخرج مئات او الاف المهندسين .. فهي حتبعت لمين ولا لمين .. دا بس طوابع البريد حتكلف الشئ الفلانى .. والحالة زي ما انتم عارفين والله يكون في العون .. الله هو ايه الكلام ده ياشهاوي امال ياسيدي الجامعة النمساويه اللى فوق بتخرج كام واحد في السنة ?? بتخرج الف مهندس ماكينات زي عندنا كده ? ولا تلاقيها بتخرج 500 بس ? ولا جايز بتخرج 200 واحد ? اصل هم عددهم صغير .. لا ياراجل ماتقولشي كده .. يعنى الاساتذه والمعيدين والمعامل والورش كل ده بس علشان 200 طالب بس ?? استنى ياشهاوي هو انت بتتكلم وترد على نفسك ولا ايه ده ? هو مين اللى قالك انها بتخرج 200 واحد ? هم اكيد في الجواب ده قالوا لك حيكرموا كام واحد .. صح ?? ايوه صح قالوا وبعتولي اسماءهم كمان وخايف اقولكم تتصدموا زي انا ما اتصدمتم زيكم .. بص ياسيدي وركز معايا في اللى حاقوله ده .. انا مش قلت لكم انها جامعه صعبه في الدراسه بتاعتها .. يعنى ثلاثه اربع اللى بيدرسوا هناك بيصقطوا ومابيكملوش الدراسه خالص .. المهم الجامعه النمساويه عندها مشكله كبيره جدا ان عدد اللى خلصوا الدراسة في السنة دي قليل جدا . ومش حيعملوا الحفل الكبير ويكلفوا نفسهم علشان 3 مهندسين ونص اللى اتخرجوا في السنه دي .. انت بتهزر ياراجل يعنى ايه تلاته ونص ? هو فيه نص بنى ادم ?? ياراجل اتكلم جد بقى .. حاضر ياسيدي اصل السنه اللى خلصنا فيها الدراسه كنا ثلاثه مهندسين فقط. .. ايوه والله في قسم تصميم الماكينات كنا ثلاثة بس اللى وصلوا لاخر المطاف .. ايوه والاساتذه والمعيدين والمعامل كلها علشان 3 طلبه بس اللى خلصوا الدراسه .. فالجامعه فكرت تعمل الاحتفال لكل اللى اتخرجوا منها مابين سنه 1981 وسنه 1992 .. يعنى اللى اتخرجوا في عشر سنين وبعتوا لنا كشف باسمائهم وطلع عدد كل اللى اتخرج من الجامعه من مهندسي الماكينات 35 مهندس بس في خلال عشر سنين .. يعنى بمعدل كل سنه ثلاثة مهندسين ونص .. عرفتم بقى الفرق بين الجامعتين .. مش بس في نوعيه الدراسه ولا في العدد .. الفرق في المعاملة وان الجامعة تفضل على اتصال علمى وادبي مع الناس اللي اتخرجوا منها ولو بعد 25 سنه .. نسيت اقولكم الحاجة الاهم .. من ورا الاحتفال ده .. انهم طلبوا منى اجيب لهم تقارير عن الاعمال الهندسيه. والماكينات اللى انا صممتها منذ سنين التخرج علشان يحصل تبادل علمى مع الجامعه ومع الزملاء علشان يشوفوا اي حاجه تنفع بلدهم من عند المهندس ده ولا المهندس ده .. نسيت اقولكم حاجة تانيه كمان .. انا قعدت ابص في كشف المهندسين اللى بعتهولي وفيه اسماء اللى اتخرجوا من هذه الجامعة العريقة في عشر سنوات ولم اجد فيهم اي اسم عربي غير اسمى .. اوعوا تفتكروا انى باتباهى وفرحان بكده .. ابدا والله كان نفسي يكون معايا اسم مصري كمان او اسمين عربيين كمان .. كنا نونس بعض ونتكلم عربي مع بعض .. ونتبادل الفكر والمعلومات واقوله انا عملت ايه وهو عمل ايه في السنين اللى فاتت .. احساس غريب انك العربي الوحيد في وسط خريجى هذه الجامعه ومش خريجى سنه واحده .. لا العربي الوحيد في خريجى عشر سنين من جامعة جراتس الهندسيه .. مش باقولكم احيانا هو نفس الخبر ولكنه في نفس الوقت يفرحك ويغمك في وقت واحد 
ملحوظة .. لو حد عايز يحضر .. التكريم حيكون في مبنى جامعه جراتس الهندسيه في النمسا يوم 27 ابريل الساعه 2 ظهرا وسيتم استعراض المشاريع الهندسية والجوائز التى حصلت عليها وفي الختام سيتم تسليم الشهاده الفخريه والوسام الفضي لتصميم الماكينات الى صديقكم وابن بلدكم وابن تراب مصر وابن الريف المصري المهندس احمد الشهاوي .. بلاش الرحالة هنا النهارده . اصل الرحالة ده قبل مايبقى رحالة كان اصله مهندس